«Крестителю Христов, проповедниче покаяния, кающагося не презри мене, но, совокупляяся с вои Небесными, молися ко Владыце за мене, недостойнаго, унылаго, немощнаго и печальнаго, во многия беды впадшаго, утружденнаго бурными помыслы ума моего. Аз бо есмь вертеп злых дел, отнюдь не имеяй конца греховному обычаю, пригвожден бо есть ум мой земным вещем. Что сотворю, не вем, и к кому прибегну, да спасена будет душа моя, токмо к тебе, святый Иоанне, благодати тезоимените, яко тя перед Господем, по Богородице, вем больша быти рожденных всех: ты бо сподобился еси коснутися верху Царя Христа, вземлющаго грехи мира, Агнца Божия. Егоже моли за грешную мою душу, да поне отныне, в первый-надесять час, понесу тяготу благую и прииму мзду с последними. Ей, крестителю Христов, честный Предтече, крайний пророче, первый во благодати мученице, постников и пустынников наставниче, чистоты учителю и ближний друже Христов, тя молю, к тебе прибегаю, не отрини мене от твоего заступления, но возстави мя, падшагося многими грехи, обнови душу мою покаянием, яко вторым крещением, понеже обоего начальник еси, крещением омываяй грех, покаяние же проповедуяй во очищение коегождо дел скверных, очисти убо мя, грехми оскверненнаго, и понуди внити, аможе ничто же скверно входит, в Царствие Небесное. Аминь».
Молитва о помощи в скотоводстве (от падежа скота) священномученику Власию, епископу Севастийскому
«Преблаженне и приснопамятне священному-чениче Власие, дивный страдальче и предстателю наш добрый, по отшествии твоем в жизнь вечную призывающим твое святое имя пособствовати и во всяких прошениих услышанным быти обещавый! Се ныне к тебе, угоднику Божию, яко ко истинному ходатаю спасения, притекаем и смиренно молимся: предстани нам в помощь, узам грехов связанным, подвигнися на всемощныя твоя к Богу молитвы и помолимся о нас грешных: тя бо, недостойнии, призывати на заступление дерзаем, и желаем от всех грехов наших тобою свобождение получити. О святый Божий Власий! В сокрушении и смирении сердца нашего пред тобою припадаем и молимся: осияй нас, омраченных наветы вражиими, светом благодати свыше, да в нем ходяще, не преткнем о камень ног наших. Тя, яко сосуд в честь избранный и исполненный благодати Божией, молим: сподоби нас грешных от исполнения твоего желаемое прияти, и исцели наша душевныя и телесныя язвы, грехом же нашим прощение и душевному и телесному нашему здравию и спасению полезное у Господа испроси, да всегда прославляем Отца и Сына и Святаго Духа, и твое милостивное предстательство о душах и телесах наших, ныне и присно и во веки веков. Аминь».
Молитва о помощи в посевной и жатве Божией Матери, пред иконой Ее «Спорительница хлебов»
«О Пречистая Дево Богородице, Премилостивая Владычице, Царице Небесе и земли, всякаго дома и семейства христианского Благоустроительнице, труждающихся благословение, нуждающихся неистощимое богатство, сирых и вдовиц и всех людей кормительнице! Питательнице наша, рождшая Питателя вселенныя и Спорительнице хлебов наших! Владычице, низпосли Твое Матернее благоволение и благословение градом нашим, и селам, и нивам, и каждому на Тя упование имущему. С благоговейным трепетом и сокрушенным сердцем смиренно молимся Тебе: о Премилосердная Мати рода христианского, буди и нам грешным и недостойным рабом Твоим мудрая Домостроительнице, житие наше добре устрояющая. Всякое же общество, всякий дом и семейство во благочестии и православии, единомыслии, послушании и довольстве соблюди. Нищия и неимущия пропитай, старость поддержи, младенцы воспитай, всех вразуми преискренне взывати ко Господу: «Хлеб наш насущный даждь нам днесь». Сохрани, Пречистая Мати, люди Твоя от всякия нужды, болезни, глада, губительства, огня, злаго обстояния и всякаго нестроения. Граду, веси нашей, домам и семействам и всякой душе христианстей и всей стране нашей исходатайствуй мир и велию милость, да славим Тя, Пречистую Питательницу и Кормительницу нашу, ныне и присно и во веки веков. Аминь».
Молитва ко Пресвятой Богородице пред иконой Ее «Одигитрия» Смоленская
«О Пречудная и Превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие!